Nyuma yo gusoza amarushanwa batinjijwe igitego, Abakobwa baterengeje imyaka 15 ba Ape Rugunga bakiriwe muri Great Hotel barashimirwa ndetse bahabwa impanuro z’icyiciro gikurikiyeho.
Ku wa mbere tariki ya 10 Ugushyingo 2025, nibwo abana b’abakobwa biga mu Ishuri rya Ape Rugugunga, baserukanye igikombe cy’igihugu cyabaterengeje imyaka 15 gitegurwa na CAF, baza kukimurikira Umuyobozi w’ikigo Bwana Crescent Karerangabo.
Ku Cyumweru, tariki ya 9 Ugushyingo 2025, kuri Stade Umuganda mu Karere ka Rubavu, amakipe y’amashuri umunani arimo ane y’abakobwa n’ane y’abahungu yakinnye imikino ya nyuma, nyuma yo kwitwara neza mu mikino ibanziriza iya nyuma yari yakinwe mu mpera z’icyumweru cyabanje.
Mu bakobwa, APE Rugunga yo mu Karere ka Nyarugenge yegukanye igikombe itsinze CFG Rwamagana penaliti 3-2 nyuma yo kunganya ubusa ku busa.
Muri ½, APE Rugunga yari yanyagiye GS Mugombwa yo mu Karere ka Gisagara ibitego 6-0 naho CFG Rwamagana itsinda PS Baptiste yari ifite igikombe giheruka, ibitego 3-2.
Mu biganiro bitandukanye byatanzwe n’abayobozi, barimo umuyobozi ushinzwe, amasomo Placide Niyoyita, Umuyobozi ushinzwe umutungo Bwana Desire Minani, Umuyobozi w’ikigo Bwana Crescent Karerangabo ndetse n’umuyobozi ushinzwe imikino y’amashuri mu Karere ka Nyarugenge Bwana Jean de Dieu Niyonsenga Bose bagarutse cyane ku gushimira abana uburyo bitwaye, cyane cyane gutwara igikombe batinjijwe igitego na kimwe mu izamu ryabo nyamara bo baratsindaga umuba w’ibitego mu izamu ryabo bahanganye.
Umuyobozi w’ikigo cya Ape Rugunga yavuze ko nta yindi ntego ituma bashyira imbaraga mu siporo itari ugutwara ibikombe. yagize ati” Twishimiye ko mutuzaniye kimwe mu bikombe twaburaga mu kabati kacu ngo twese umuhigo wo gutwara ibikombe byose by’amashuri byakiniwe ku butaka bw’uRwanda. Twari tumaze imyaka ibiri dushaka iki gikombe, none ku mwaka wa gatatu gikinwa turacyegukanye, n’ibyagaciro kanini kandi turizera ko mutazatezuka ku ntego twihaye yo gutwara ibikombe” Umuyobozi yakomeje avuga ko bitarangiriye aho, ahubwo bahanze amaso ibihumbi ijana by’amadorari $100k bagiye gukinira mu gihugu cya Uganda. Ati” dore mubonye itike yo guhagararira igihugu, turabasaba ko mutazagenda mugiye kwitabira gusa ahubwo tuzagende tugiye guhatanira igikombe. uyu munsi bambwiye ko Ferwafa yabahembye ibihumbi magana atanu 500,000frw, ariko amakuru nakuruye nuko hariya mugiye hazaba hariyo ibihumbi ijana by’amadorari, ubwo rero murumva ko gutwara igikombe gifite n’amafaranga ntako bisa. Ariya nayo ni ayacu kandi mbizeyeho ubushobozi ko muzayazana, n’ikimenyimenyi nzabaharekeza Uganda nk’abanyeshuri banjye mbatere ingabo mu bitugu.”
Umuyobozi ushinzwe siporo mu mashuri mu Karere ka Nyarugenge wari umushyitsi mukuru Bwana Jean de Dieu Niyonsenga, yavuze ko yishimira uburyo bitwaye i Rubavu ndetse aboneraho kubaha impanuro. Ati” Mwaranshimishije cyane kuzana igikombe mukaduhesha, ariko mboneyeho no kubatangariza ko kugira ngo na kiriyq cyo hanze tuzakizane tugomba kugira ibintu bitatu bikurikira, Uburere, Umurava n’ubutore. ibyo bitiranze aho turi hose ntacyo tutageraho.”
APE Rugunga izahagararira u Rwanda mu mikino Nyafurika izabera muri Uganda tariki 6-9 Ukuboza 2025.
Abakinnyi bitwaye neza mu bakobwa bose biga mu ishuri rya Ape Rugunga, ni umunyezamu Igisubizo Fridaus, Impano Ange watsinze ibitego byinshi na Mukaniyonsenga Christella wabaye umukinnyi w’irushanwa, bose bafite imyaka 14.
